المارشال
Admin
عدد المساهمات : 273
تاريخ التسجيل : 14/02/2010
 |  موضوع: رساله من مغترب الي المدعو عمر حسن احمد البشير- رئيس عصابة الإنقلاب في جمهورية السودان الثلاثاء مايو 08, 2018 2:53 pm | |
|
اما بعد
ياخ عليك دينك كفاية دايرين نرجع بلدنا
دايرين نشرب شاي في عتبة المطبخ مع امي كبايه كبييييره مع عيش جديد مابايت من الدكان وتدور الشكله اليومية قوم من العتبه بقعد فيا الشيطان هههههههههههه شيطان عوير زاتو البقعد في العتبه
دايرين دعوات ونحن مارقين
دايرين نصلح سلكة باب الشارع البتتقطع كل يوم دي بسبب دخله ومرقه الناس الصباح
دايرين نشمع في المواصلات دايرين نتشاكل مع الكمساري دايرين نقعد في كراسي شكرا عشان نشرك للجكس
دايرين نتغدا في البيت فترنا من غدا الهنود البجيبو ليك في صحانه زي حقت المستشفي
دايرين ننوم في الحوش المطره تصب ندخل اللحافات الاوضه المطره تقيف نرجع الحوش المطره تجي ندخل اللحافات وعلي هذا الحال لمن تصحي بفليته وتتعلق ليك في اي باب عشان تفك
دايرين نتلم الضهر تحت شجره ترص مكنه طوب وتخت فيا سفنجتك وتقعد تتونس
دايرين نلف في الشمس دايرين نخلط في كفتريا سنتر الخرطوم
دايرين شاي مغرب
حرام عليك ياخ فقدنا هويتنا
فقدنا سمرتنا بقينا بيض السمره راحت
عيب ياخي
كفايه عليك دينك كفايه
العمر كلو كم وسبعين سنه احلا سنين ياها المتغربين فيها دي
دايرين غدا الجامعه
دايرين نغسل هدومنا في طشت الجمعة الصباح
دايرين كل جمعه نطلع راس البيت بتاع الاوضه صبت
دايرين نترسل نمش الدكان تلقي بت الجيران تحنك معاها وبتاع الدكان يتساغل معاك ويمشيك اول عشان ينفرد بيها ود الكلب قاصدا طبعا
عليك دينك كفايه دايرين نبرد شوق اهلنا
دايرين نصل رحمنا
دايرين كتمه زنقه بقونه غبار وصيوان
دايرين نكشح مويه العده
دايرين ننضف المصطبه بكره العيد
ونواسي الشوارع ونقش الفسحه لصلاة العيد
دايرين دافوري في الفسحه ينتهي باذان المغرب ومامعروف النتيجه كم
عليك دينك كفايه دايرين نقعد في فرشه لغاية مواعيد السحور ونشيل باغاتنا ونقعد نصحي الناس للسحور
عليك دينك كفايه امشي خلينا نعيش
زي ماكنا بناكلا كسره بمويه مادايرين انقاذ مادايرين ياخ
ماتبيع جامعة الخرطوم خلينا كده ما دايرين سياحه
كفايه ياخي عذبت الناس وشردتهم كفايه ياخ خليت الواحد ينسي شكل اخوهو
كفايه ياخي خليت الواحد يبكي علي امو وهي حيه
كفايه ياخي طلعت ميتينا زاتو
كفايه ياخي خليتنا جيف
خليتنا فارغين من جوه
كفايه ياخي خليتنا متابعين الدولار اكتر من المريخ والهلال
عليك دينك كفاك
كفايه خلينا نرجع ونبنيهو ونبني نفوسنا الفضت
خلينا نتغدا في صينيه واحده
خلينا نطلع فرشات لفطور رمضان
خلينا نشيل الابريق ونغسل للناس في المناسبات ويمعطوك بالأسئلة
كفايه خلينا ننوم فب الحوش مطمئنين وشبعانين
كفايه خلينا نصحي علي صوت الام
ولا بوكس الطماطم ولا صفاره عربيه الوسخ
كفايه كفايه عليك دينك كفاااااااااااااااايه .
 | |
|
