عزت السنهوري
عدد المساهمات : 437
تاريخ التسجيل : 01/07/2011
 |  موضوع: مِسدار الجيش :- الخميس مارس 03, 2022 1:42 pm | |
|
مانشيت الصحف نشرت كباسن شاكي
قال الجيش تقازّم وهان كرامة الكاكي
يا بلد السمر قوليلي إيه الجاكي
بتريدي البِذِلِك وتكرهي البهواكِ
الجيش في الضعين ضاق المهازل عرقهّ
اتهرشوا الجنود وإندقّ قائِد الفرقهّ
الفعل الحصل يا ديشنا كان بتدرقهّ
في وجه الشعب الاحترام بتفرقهَ
السوس كان كتر عود المِرق بنشّق
والجيش كان سِلم من الوسخ بتنق
معليش يا عميد الجنجويد على حق
فالجيش تلوّث بالحركات وكل يوم تِندق
في عهد الملايش وانعدام العيش
خربانه البلد ما فيها هيبة جيش
تندق يا عميد برضك تقول معليش
وخليه الشعب الدولة تحمي الجيش
صقر الجديان حزن خو وتباكي علينا
وقال بالصريح النصرما لينا
ما دام الحكم كتل الرجال الزينهّ
اتهانت عروضنا ولامست كرعينا
ديل اكلوا السمح والجيش اكل طعمية
واتخطوا الرتب بي رتب وهمية
يا حليل البلد لما كان محمية
بالكاكي المدرع وهيبته القومية
رغم الظلم عاث فوق الضماير وفذّة
لسع باقي في وجدانها عسكور عزّة
لو ما الجيش تقلبن والمكان بتنز
ما بتنهز كان كل الخلق ينهز
الجيش قومي كان لا عرب لا نوبة
وهسع تخصخص في رتب ملعوبة
لو ما حكم القجر والدنيا جات مقلوبة
ما بنزل يمين علم الشعارها قروبة
يا حليل الزمن العد روح جيلها
زمن العساكر ما بعرفوا قبيله
بلدا رجال فيها مخدر نيلها
كيف تنزل لي شلة وتفك دا الحيلة
الجيش تهمّل وسيسوا الطابور
وجينج التعنصر في الحصل معزول
النضم الهرش في الدار صبح محظور
وبقت الملايش وحدها العسكور
القال الحقيقة بِيندقّ و بيدخل الزنزانه
والمليشيات بتهرِش الدولة بي اركانها
راتبهم مضخم والجيوب مليانة
والجيش بالفلس متقحبد الجبخانة
ما شفنا الاسد من النعام بتحاب
وما اظن الضكر في يوم بيكون مشاط
هم والرئيس كل البيكون يوم في بلاط
وقدام العساكر بكتلوا الضباط
سوي الناجدة يا جيش واتحد في لامة
وقوميتك تفيض فينا وتغطي العامة
لاك الشعب وجع ومراير سامة
والحاكم تجبر واتنفخ في هامة
كان هضلم ظلم بي عازة في اولادها
ورحمها يوت بينجب في الجنود والقادة
ماتوا الرجال والجيش فقد اوتادها
بس غيرهم بكون دام امهم ولادة
جمع الغبش شان سلطة ما هو فراسه
وكل الفتن يا ديش بقت من ساسهّ
الايدهم بقت فوق الجراح نخاسهّ
هم في القصور والميري بكتل ناسّه
إغتصبوا البلد بالظلم تلاتة عقود
وزادوا الكروش والشعب ناشف عود
كان هم الشعب فوق الكبك مفقود
ينكال الرماد في خشمكم هبوت
ديل همهم سلطة وعرس نسوان
وشبع البلد في حكمهم توهان
هم والاباليس في الاصل اخوان
وانكسرت عشانهم هيبة السودان
عِشنا وشوفنا يا جيشنا هوان البرهان
البِخاف من جواسيس كعقار وعرمان
وسيدمج مرتزقتهم في جيش السودان
هل الكلب يؤتمن على اللحم يا غبيان
| |
|
